Барааны тайлбар:

Зохиолч Ж.Нарана-н "Ханзны хатан хаадын хилэнц" роман. Манайд төдийлөн хөндөөд байдаггүй сэдэв болох хятад хүнтэй ханилсан хүрээ хүүхнүүдийн тухай, тэдний жаргал зовлон, амьдралын баяр гунигийг энгүүн сайхан хүүрнэн өгүүлсэн уг романаас бодох санах, ухаарч ойлгох зүйл багагүй байх биз.Дотор газрын хүний ааш араншин, арга ухаан, санаа бодол, амьдралын үзлийг маш тодорхой дүрслэн үзүүлж, саар нь зөндөө байвч сайн нь бас мундахгүй бий гэдгийг тодотгон харуулжээ. Үйлийн эрхээр ч юм уу, өөрийн хүслээр ч юм уу, өнгө мөнгөнд хууртсандаа ч юм уу хувь заяаны янз бүрийн замаар дотор газрын хүмүүстэй ханилан суух явдал хүрээ хүүхнүүдийн дунд их түгээмэл үзэгдэл байжээ. Залуу сайхан цагт эд баялаг, эрх ямбанд жарган суувч насны эцэст ямархан хувь тавилан хүлээж байгааг хэн яахин мэдэх билээ. Хүний юм хүнд наалдахгүй гэгчээр өөрөө хөдөлмөрлөж олоогүй юм бүхэн нэгэн цагт хумхийн тоос мэт ор мөргүй алга болдог жамтайг ухааруулахыг зорьсон байна. Зохиолын үйл явдал 1920-д оны дунд үеэс эхэлж, жараад он хүртэл үргэлжлэх завсар төрсөн эгч дүүс мэт ижилдэн дассан Дариймаа, Дийдэнханд гэх хоёр бүсгүйн туулсан амьдралын гашуун түүхийг хувь заяаны ээдрээн дунд сонирхолтой өрнүүлж чадсан байна.

#393